Turih ku Pucuk Eurih
Dina hiji poe
isuk-isuk di pesisian leuweung, sisi gawir, kembang jeung dadaunan bangun
gumbira moyan ku haneutna panon poe nu kakarak ngiang rek mayung ka luhur.
Kadenge aya lengkah ting korosak sora dadaunan
jeung regang katincak, sing horeng aya barudak leutik duaan jigana mah adi
lanceuk. Duka teuing naon nu diteanganna budak teh nu hiji mah ulak-ilik wae ka
luhur tatangkalan,meureun sugan wae aya sayang manuk komo aya anak manukna mah
keur cocooan adina. Teu kungsi lila terekel wae nu jadi lanceukna naekan hiji
tatangkalan bari tetep ulak-ilik milah-milih keur muntang jeung tincakeun.Sajeroning
kitu adina mah cingogo wae na jujukutan bari merhatikeun lanceukna diluhur
tatangkalan.
Geus rada lila
lanceukna can oge beubeunangan bari lukat-leket kesang, bari hese ngaronjatna
sayang manuk teh. Ti handap kadenge ku manehna sora adina hahariringan, pok na
“Cing tulungan.. cing tulungan.. aya nu gagarayaman dina suku nyarocoan”. Ditembalan
ku lanceukna “Usap wae ku panangan paling oge sireum atawa simeut”. Sababaraha
kali adina ngan kitu jeung kitu wae hariringna.
Panasaran nu jadi
lanceuk nenjo adina ka handap reuwas teu aya bandinganana, hampir wae leungena
leupas tina pamuntangan geningan adina teh keur dileugleug oray. Gancang wae
manehna tuturubun turun rek moro adina tina sungut oray. Bingung kudu kumaha da
si oray embung ngaleupaskeun. Bari awakna leuleus ngalempreh lanceukna ngadenge
sora manuk “Cung klik.. turik..” sababaraha kali, lila-lila kadenge ku manehna
jiga nu mere nyaho “Cung klik.. turik.. cung klik.. turik.. turih wae ku pucuk
eurih..”. nya gancang wae manehna neangan daun eurih, nya diturihkeun kana awak
oray. Lila-lila si oray ngalepaskeun awak adina, tuluy adina di gabrug, tuluy
diakod dibawa balik.
No comments:
Post a Comment